ՈՒՂԻՂ ԵԹԵՐ
192 Kbps
128 Kbps
64 Kbps
48 Kbps
Arm Radio FM 107
Vem Radio FM 91.1
Im Radio FM 103.8
Ազգայնամոլները Թուրքիայում այսօր կփորձեն ուրբաթօրյա նամազ կազմակերպել Այա Սոֆիայում
2019-02-01 11:18:01

Այա Սոֆիան վերստին մզկիթ դարձնելուն ուղղված գործունեությամբ հայտնի Գաղափարական միասնության և պայքարի հարթակ կազմակերպությունը Թուրքիայի մահմեդականներին կոչ է արել այսօր հավաքվել Այա Սոֆիայում` ուրբաթօրյա նամազի: Հարթակն այդ միջոցառումը կազմակերպում է` «Նամազի համար նախատեսված գորգդ վերցրու և արի» կարգախոսով՝ հաղորդում է Akunq.net-ը` հիմնվելով թուրքական լրատվամիջոցներում հրապարակված լուրի վրա:

Աղբյուրի համաձայն` նախատեսվում է, որ նամազին մասնակից թուրք մուսուլմանները կաղոթեն նաև Այա Սոֆիան կրկին մզկիթի վերածելու համար: Ազգայնամոլ կազմակերպությունը նախատեսում է նաև նամազից հետո հանդես գալ մամլո հաղորդագրությամբ: Հրապարակված լուրերում, սակայն, չի նշվում, թե այս միջոցառման կազմակերպիչներն ինչպե՞ս են պատրաստվում մուտք գործել թանգարան: Ինչպես հայտնի է, Այա Սոֆիան գործում է որպես թանգարան, մուտքն այնտեղ ազատ չէ, և հարկ կլինի տոմս գնել:

Այա Սոֆիա (Սուրբ իմաստնություն) հոյակերտ եկեղեցին, որը ժամանակին Կոստանդնուպոլսի տիեզերական պատրիարքի նստավայրն էր, կառուցվել է 532-537 թթ. Բյուզանդիայի կայսր Հուստինիանոսի կողմից: Օսմանցիները 1453 թ. Կոստանդնուպոլիսը գրավելուց անմիջապես հետո այն վերածել են մզկիթի: Այա Սոֆիայում վերանորոգումներ են կատարել նաև հայ ճարտարապետ Տրդատը և հայկական ծագում ունեցող Սինան ճարտարապետը: Թուրքիայի Հանրապետության շրջանում, 1930-ական թվականներին Այա Սոֆիան վերածվել է թանգարանի և մինչ այժմ գործում է այդ կարգավիճակում: Ժամանակ առ ժամանակ թուրք ազգայնամոլները հանդես են գալիս այն վերստին մզկիթ դարձնելու պահանջով: