ՈՒՂԻՂ ԵԹԵՐ
192 Kbps
128 Kbps
64 Kbps
48 Kbps
Arm Radio FM 107
Vem Radio FM 91.1
Im Radio FM 103.8
Կոռուպցիայի դեմ պայքարի մոտեցումները բախվում են
2019-02-06 18:16:34

Լուսինե Վասիլյան
«Ռադիոլուր»

Գործադիրը ծարգրում  կոռուպցիայի դեմ պայքարը հայտարարել է իր հիմնական առաջնա­հերթու­թյուններից մեկը: Փաստաթղթում նշվում է,  որ կառավարությունը անզիջում պայքար  է մղելու կոռուպցիայի դեմ՝ ակնկալելով հանրային լայն աջակցություն և համագործակցություն իրավապահ մարմինների հետ։

Կոռուպցիան պետք է արժանանա հանրային արգահատանքի՝ գրված է ծրագրում: Ակնկալվում էր, որ փաստաթղթում  պետք է պատասխան գտնի այն հարցը, թե ինչպիսի  հակակոռուպցիոն մարմին է  գործելու Հայաստանում: Անորոշությունը ձևավորվել էր համապատասխան օրենքի ընդունման,  բայց նոր կառույցի չձևավորման արդյունքում: Երեկ երեկոյան տարածած հայտարարության մեջ  հենց այդ իրավիճակն է որպես պաշտոնից հրաժարվելու պատճառ նշել Բարձրաստիճան պաշտոնատար անձանց էթիկայի հանձնաժողովի նախագահը:

 

0:00
0:00

 

Նախորդ տարվանից անորոշ է Կոռուպցիայի կանխարգելման հանձնաժողովի ստեղծման հարցը: Նախատեսվում էր, որ այս կառույցը պետք է ձևավորվի 2018-ին և  փոխարինի Բարձրաստիճան պաշտոնյաների էթիկայի հանձնաժողովին: Օրենքով ժամկետներ էին սահմանվել, նախատեսվել էր, որ պետք է մրցույթ անցկացվի, որի արդյունքում ընտրված թեկնածուներին հանձնաժողովի անդամ պետք է  նշանակեր  Ազգային ժողովը:

2018-ի ընթացքում խորհրդարանն այս կառույցը ձևավորել չկարողացավ:  Արադարադատության փոխնախարարի կարծիքով՝  նաև օբյեկտիվ պատճառներով:

«Կարծում եմ, որ այդ մարմինը չստեղծվեց նաև օբյեկտիվ օբյեկտիվ պատճառներով: Հեղափոխությունից հետո  կառավարությունն ու խորհրդարանը ավելի շատ քաղաքական օրակարգով էին զբաղված: Բացի դրանից, դժգոհություն  կար հանձնաժողովի ձևավորման մեխանիզմների հետ կապված: Միգուցե նոր ինստիտուցիոնալ համակարգը ստեղծվի նոր Ազգային ժողովի և կառավարության ծրագրերին համահունչ»:

Այսօր հրապարակված կառավարության ծրագրի կոռուպցիայի դեմ պայքարին վերաբերող հատվածում գրված է, որ  գործադիրը կարևորում է մասնագիտացված, անկախության երաշխիքներով օժտված հակակոռուպցիոն մարմնի ստեղծումը, որը կիրականացնի ուսումնասիրություններ, օժտված կլինի կոռուպցիոն հանցագործությունների բացահայտման համար անհրաժեշտ գործիքակազմով:

Արդյո՞ք ծրագրից պարզ  է դառնում, թե որ ճանապարհով է ուզում գնալ  կառավարությունը՝ կանխարգելման հանձնաժողովը պահպանելո՞ւ, թե՞ նոր՝ ավելի մեծ իրավասություններ ունեցող մարմնի ստեղծելու ճանապարհով՝ հարցնում եմ «Թրանսփարենսի ինթերնեշնլ» հակակոռուպցիոն կենտորնի ծրագրերի ղեկավար Վարուժան Հոկտանյանին:  

«Անհասկանալի է, թե այս ձևակերպման, ինստիտուցիոնալ համակարգի տակ ինչ է դրվում: Հստակ պետք է գրված լիներ ունիվերսալ մարմին կամ տարանջատված մարմին, բայց որևէ հստակություն չկա»:

Թե ինչու չկա այդ հստակեցումը, Վարուժան Հոկտանյանը միայն ենթադրում է: «Կարծես թե միասնական որոշում ու կոնսենսուս չկա  նաև կառավարության ներսում»:

Վարուժան Հոկտանյանն ասում է նաև, քանի որ այդ կոնսենսուսը չկար նաև քաղհասարակության շրջանում: Մի մասը ունիվերսալ մոդելի կողմանկից էր, մյուս մասը ՝ երկու առանձին կառույց ունենալու:

Էթիկայի հանձնաժողովի արդեն նախկին նախագահ Սիրանուշ Սահակյանը հակակոռուպցիոն ռազմավարության շուրջ օրերս կազմակերպված քննարկմանն ասում էր, թե մոդելի որոշման հարցում արագ կողմնորոշվելու խնդիր կա:

Ձգձգումը խաթարում է արդեն իսկ ստեղծված ենթակառուցվածքների գործունեությունը՝ ասում էր Սահակյանը և մի քանի օրինակ բերում:

 «Ներկաներից քանի՞սն է տեղյակ, որ հունվարի 1-ից ուժի մեջ է մտել հայտարարագրերի նոր  բովանդակությունը, բայց նոր ձևանմուշները հասատաված չեն: Հիմա մենք ո՞ր հայտարարագրերը վերցնենք»:

Այս իրավիճակը Սիրանույշ Սահակյանը նշել է որպես Բարձրաստիճան պաշտոնատար անձանց էթիկայի հանձնաժողովի նախագահի պաշտոնը թողնելու պատճառներից մեկը: Ստեղծված իրավիճակն անհամատեղելի է մասնագիտական գործունեության վերաբերյալ իմ  մոտեցումներին՝ երեկ երեկոյան տարածած հայտարարության մեջ նշել է  Բարձրաստիճան պաշտոնատար անձանց էթիկայի հանձնաժողովի նախկին նախագահը: